Vyewo

Nan mitan youn chan kann bò ‘‘Higwèy’’
An Dominikani
De Ayisyen chita nan oun batèy
Pye atè do touni

Younn ape pale, younn ap koute
Yo pa fè bri
Van nan kann nan sèlman ki tande
Sa y’ ape di
Vyewo, ou k’ap fè tè Ayiti
Men oun komisyon w’ a bay madanm mwen pou mwen
Vyewo se oun ‘‘Dièz Peso’’

Vyewo avèk oun pè zanno
Lè ou rive si ou pa jwenn li plase
W’ a bay manman mwen-l pou mwen
Vyewo ale, Vyewo tounen
Avèk Nouvèl ki bay kè plen
Manman-an mouri
Sa genyen kèk lannen
Gen mounn ki di

Ke se chagren
Madanm nan la, l’ ape kenbe
Men timounn yo mal okipe
Premye-a grandi tankou chwal
Ti dènye-a pa menm sonje papa’l
Nan mitan youn chan kann bò ‘’Higwèy’’
An Dominikani
De Ayisyen chita nan oun batèy

Pye atè do touni
Youn ape pale, younn ap koute
Yo pa fè bri
Van nan kann nan kouri efase
Sa y’ ape di
Kouzen m’sot fè tè Ayiti
Men youn komisyon, madanm ou voye ba-ou
Kouzen li lè pou ou tounen

Kouzen, menm si ou pa pot anyen
Lè w’ ap janbe fwontyè
Pa bliye manchèt ou dèyè

(Jean-Claude Martineau)